MARATHON hodie MARATONA Sophiano

MARATHON, hodie MARATONA Sophiano

aliis Marason, Attici agri civitas, distans ab Athenis circiter 10. mill. pass. non procul a Tricoritho, et Rhamnunte, nece Icarii regis insignis, et Miltiadis gloria, qui ibi centum milia ex Darii Regis Persarum exercitu profligavit: Item Thesei victoriâ, qui ibi taurum Marathonium superavit. Ovid. Metam. l. 7. Fab. 23.

—— Te maxime Theseu,

Mirata est Marathon Cretaei sanguine Tauri, Nic. Loydius.

Nunc Marathona Baudrand. versus oram Euripi, 35. mill. pass. ab Athenis in Caeciam vicus hodie parvus. Sub Turcis. Inde Marathonius, ut Marathonia virgo pro Erigone. Papinius l. 5. Sylv. 3.

—— Nec enim Marathonia virgo

Parcius exstinctum saevorum crimine agrestum

Fleverit Icarium. ——

Item Marathon vicus in tribu Leontide. Steph. Sed et Murathonis campi meminit Solin. c. 7. Atheniensibus iudicii locus Arios pagos. Marathon campus factus memorabilis opinione proelii cruentissimi. Quem locum ex Mela l. 2. c. 3. sumpsit: Marathon magnarum multarumque virtutum testis, iam inde a Theseo, Persarum maxime clade pernotus. Quae planities ad 12. milliaria se extendit, et maximâ parte cultis agris constat, qui a montibus vicinis usque ad mare patent. Dividitur fluviô cognomine, qui Macaria forte Veteribus dictus, oritur ex monte Parnethe et vicum praedictum perfluens in Euripum sese exonerat. Ipse locus olim tam celebris hodie vix quindecim aut viginti zengariis casisque Atheniensium constat, ubi Albanorum ad centum quinquaginta forte degunt. Non vero ad Leontidem Tribum. sed Aiantidem potius pertinere Marathona, docet Iac. Sponius Itinerar. Graeciae Part. 3. in Inscr. antiqq. p. 157. ubi, praeter insignem Inscriptionem, eamque satis prolixam, hanc quoque exhibet, in Monaterio S. Andreae Athenis hodie exstantem:

ΑΥΡΗΛΙΟΞ

ΕΥΕΛΠΙΣΤΟΞ

ΜΑΡΑΘΩΝΙΟΞ

ΠΡΕΞΒΥΤΕΡΟΞ.

Apud eundem Part. 2. p. 86. Seleuci Marathonii, Gymnasiarchae Atheniensis, memoriam servat ista Inscr. in Delo.

ΒΑΣΙΛΕΩΣ ΜΙΘΡΑΔΑΤΟΥ

ΕΥΕΡΓΕΤΟΥ ΣΕΛΕΥΚΟΣ

ΜΑΡΑΘΩΝΙΟΣ ΓΥΜΝΑΣΙΑΡΧΩΝ.

De iuramento, μὰ τοὺς ἐν Μαραθῶνι, pr eos, qui in Marathonia pugna obierunt, Demostheni memorato vide supra.